धेरै टाढा त कहाँ छौ र हामी

यो पृथ्वीको एउटै छातामुनि त छौँ

दुर्भाग्य यत्ति हो

विशाल महासागर छ हामीबीच

वारि म छु, तिमी पारि छौ

थाहा छ-

बाँधिन सक्तैनौँ हामी एक अर्काको अँगालोमा

समाउन सक्तैनौँ एक अर्काको हात

पुछ्‍न सक्तैनौँ एक अर्काको आँसु

तर पनि यस्तो लाग्छ

यो समुद्रले छुट्याएको छैन हामीलाई

जोडेको छ बरु एकअर्कासँग।

जुनेली रातमा

कालो आकाशको छहारीमुनि

मनमुग्ध शीतलताले मातिएर

म बस्छु समुद्रवारि

बस्छ्यौ तिमी समुद्रपारि

यो टुक्कीजस्तो जूतसँग

खुब बात मार्छौँ हामी

गफिन्छौँ रातभर

रुन्छौँ कहिले

समुद्रको नुनिलो पानीमा

नुनिला आँसुहरु मिसाउँदै

हाँस्छौँ कहिले

छालको तालहरुसँग

लयमा लय मिलाउँदै

गुनगुनाउँछौँ गीत कहिले

लगाउँछौँ प्रित कहिले

सुसेली हाल्छौँ कहिले

फाटेको मन टाल्छौँ कहिले